அமெரிக்காவின் அச்சுறுத்தலை முன்கூட்டியே கணித்த ஈரான்: நிலத்தடி ஏவுகணைத் தளங்களின் மாபெரும் ரகசியத்தை உடைத்த பேராசிரியர் மராண்டி!
அமெரிக்க அதிபர் டொனால்ட் ட்ரம்ப் ஈரானின் மின்னுற்பத்தி நிலையங்களை அழிப்பதாக 48 மணிநேர இறுதி எச்சரிக்கை விடுத்துள்ள நிலையில், அமெரிக்காவின் தாக்குதல்களை எதிர்கொள்ள ஈரான் பல வருடங்களாகவே நிலத்தடியில் தயாராகி வந்த பகீர் தகவல்களை டெஹ்ரான் பல்கலைக்கழகப் பேராசிரியர் மொஹமட் மராண்டி (Mohammad Marandi) சர்வதேச ஊடகமொன்றுக்கு வழங்கிய நேர்காணலில் அம்பலப்படுத்தியுள்ளார்.
பழைய ஏவுகணைகளின் மாபெரும் வியூகம்:
அமெரிக்கா மற்றும் இஸ்ரேலின் வான்பாதுகாப்பு அரண்களைச் செயலிழக்கச் செய்யும் மாபெரும் வியூகத்துடனேயே ஈரான் இந்தப் போரைக் கையாண்டு வருவதாக அவர் தெரிவித்துள்ளார். யுத்தத்தின் ஆரம்ப நாட்களில் ஈரான் தனது இருப்புக்களில் இருந்த மிகவும் பழைய ட்ரோன்கள் மற்றும் ஏவுகணைகளையே (oldest drones and missiles) பிரதானமாகப் பயன்படுத்தியது. பில்லியன் கணக்கான டொலர்கள் பெறுமதியான எதிரிகளின் வான்பாதுகாப்பு ஏவுகணைகளை வீணாக்குவதே (empty the air defenses) இதன் பிரதான நோக்கமாகும். அவை தீர்ந்த பின்னரே, ஈரான் தற்போது தனது புதிய தொழில்நுட்பங்களைக் களமிறக்கத் தொடங்கியுள்ளதாக அவர் சுட்டிக்காட்டினார்.
நிலத்தடித் தளங்களும் ஹார்முஸ் ஜலசந்தியும்:
ஆப்கானிஸ்தான் மற்றும் ஈராக் மீதான அமெரிக்க ஆக்கிரமிப்புகளின் போதே விழிப்படைந்த ஈரான், பல வருடங்களாகத் தனது அதிநவீன ஏவுகணைகள் மற்றும் கடற்படையைப் பூமிக்கு அடியிலுள்ள பாதாளத் தளங்களிலேயே (underground bases) பாதுகாத்து வருவதாகப் பேராசிரியர் மராண்டி தெரிவித்தார். மேலும், ஹார்முஸ் ஜலசந்தியை ஈரான் கடலோரப் பகுதியிலிருந்து கட்டுப்படுத்தவில்லை எனவும், கடற்கரையிலிருந்து நூற்றுக்கணக்கான கிலோமீட்டர்கள் உள்ளே அமைந்திருக்கும் நிலத்தடி ஏவுகணைத் தளங்கள் மூலமாகவே (hundreds of kilometers inside Iranian territory) அதனைத் தமது கட்டுப்பாட்டில் வைத்துள்ளதாகவும் அவர் தெரிவித்தார். எனவே, அமெரிக்கா கடலோரப் பகுதிகளைக் கைப்பற்றினாலும் அது எவ்விதப் பலனையும் அளிக்காது என அவர் எச்சரித்துள்ளார்.
மக்கள் மத்தியில் தொடரும் வீரம்:
இஸ்ரேல் மற்றும் அமெரிக்கப் படைகள் மருத்துவமனைகள், பாடசாலைகள் மற்றும் செஞ்சிலுவைச் சங்கம் (Red Crescent) போன்ற சிவிலியன் உட்கட்டமைப்புகள் மீது 'டபுள் டேப்' (double tap attacks) எனப்படும் இரட்டைத் தாக்குதல்களைக் கொடூரமாக முன்னெடுத்து வருகின்றன. எனினும், ஈரானிய மக்கள் இந்த அச்சுறுத்தல்களுக்குப் பயந்துவிடவில்லை எனவும், ஒவ்வொரு நாளும் இரவில் யுத்தத்திற்கு ஆதரவாகப் பாரிய பேரணிகளில் (huge rallies) அவர்கள் ஈடுபட்டு வருவதாகவும் அவர் தெரிவித்தார். ஈரானின் மின்நிலையங்களை அழிப்போம் என்ற ட்ரம்பின் பிடிவாதம், உலகை 1929-ஆம் ஆண்டை விட மிக மோசமான உலகளாவியப் பொருளாதார மந்தநிலைக்கு (global economic depression) இட்டுச்செல்லும் என அவர் திட்டவட்டமாக எச்சரித்துள்ளார்.
