வளைகுடாவில் விரிவடையும் எரிசக்திப் போர்: அமீரகம், சவுதி, கத்தார் எரிசக்தித் தளங்கள் மீது ஈரான் பாரிய தாக்குதல்!
மத்திய கிழக்கின் போர் தற்போது ஒரு முழுமையான 'எரிசக்திப் போராக' (Energy War) உருவெடுத்துள்ளது. ஐக்கிய அரபு அமீரகத்தின் மிக முக்கியமான எரிவாயுத் தளங்களை இலக்கு வைத்து ஈரான் நடத்தும் தாக்குதல்களை ஒரு "அபாயகரமான விரிவாக்கம்" (Dangerous escalation) என ஐக்கிய அரபு அமீரகம் (UAE) வியாழக்கிழமை அதிகாலை வன்மையாகக் கண்டித்துள்ளது.
அமீரகத்தின் எரிவாயு உற்பத்தி முடக்கம்:
ஹப்ஷான் (Habshan) எரிவாயு நிலையம் மற்றும் பாப் (Bab) எரிவாயு வயல் ஆகியவற்றின் மீது ஈரானிய ஏவுகணைகள் மற்றும் ட்ரோன்கள் இடைமறிக்கப்பட்டதைத் (Interceptions) தொடர்ந்து, அந்தத் தளங்களில் எரிவாயு உற்பத்தி மற்றும் விநியோக நடவடிக்கைகள் முற்றாக நிறுத்தப்பட்டுள்ளதாக அபுதாபி அதிகாரிகள் உத்தியோகபூர்வமாக அறிவித்துள்ளனர்.
கத்தார் மற்றும் சவுதி மீதான தாக்குதல்கள்:
கத்தாருக்கும் ஈரானுக்கும் பொதுவான பாரசீக வளைகுடாவில் அமைந்துள்ள ஈரானின் 'சவுத் பார்ஸ்' (South Pars) கடலோர இயற்கை எரிவாயு வயல் மீது இஸ்ரேலும் அமெரிக்காவும் இணைந்து பாரிய தாக்குதலை முன்னெடுத்திருந்தன. இதற்குப் பதிலடி கொடுக்கும் வகையிலேயே, கத்தாரில் உள்ள எரிவாயுத் தளங்கள் மீதும் ஈரான் தாக்குதல்களை மேற்கொண்டுள்ளது.
அதேவேளை, தமது நாட்டின் இயற்கை எரிவாயுத் தளங்களைக் குறிவைத்து இரவு முழுவதும் ஈரான் ஏவிய ட்ரோன்களைத் தமது வான்பாதுகாப்பு அமைப்புகள் சுட்டு வீழ்த்தியுள்ளதாக சவுதி அரேபியாவும் தெரிவித்துள்ளது. அமெரிக்க மற்றும் இஸ்ரேலிய நடவடிக்கைகளுக்கு அரபு நாடுகள் துணைபோவதாகக் கருதியே ஈரான் இந்த அதிரடித் தாக்குதல்களை ஆரம்பித்துள்ளமை சர்வதேச எண்ணெய் மற்றும் எரிவாயுச் சந்தையில் பாரிய பதற்றத்தை ஏற்படுத்தியுள்ளது.
