ஒவ்வொரு ஆண்டும் ஆகஸ்ட் 30 ஆம் திகதி, வலிந்து காணாமல் ஆக்கப்பட்டோருக்கான சர்வதேச தினமாக உலகளாவிய ரீதியில் அனுசரிக்கப்படுகிறது.
“பாதிக்கப்பட்டவர்களுக்கு முன்னுரிமை. இப்போதே செயல்படுவோம்” என்ற தொனிப்பொருளை மையமாகக் கொண்டு இம்முறை இந்த நாள் அனுசரிக்கப்படுகிறது.இத்தினம், காணாமல் ஆக்கப்பட்டோரின் குடும்பங்களுக்கு உண்மையை அறியும் உரிமை, நீதி மற்றும் இழப்பீடு வழங்கப்பட வேண்டியதன் அவசியத்தை வலியுறுத்துகிறது.
2006ஆம் ஆண்டு டிசம்பர் 20ஆம் திகதி ஐக்கிய நாடுகள் பொதுச் சபையால் அனைத்து நபர்களையும் வலிந்து காணாமல் ஆக்கப்படுவதிலிருந்து பாதுகாப்பதற்கான சர்வதேச சாசனம் ஏற்றுக்கொள்ளப்பட்டது. பின்னர், 2010ஆம் ஆண்டு டிசம்பர் 21ஆம் திகதி 65/209 தீர்மானத்தின் மூலம் ஆகஸ்ட் 30 சர்வதேச தினமாக அறிவிக்கப்பட்டது.
இலங்கையிலும் வலிந்து காணாமல் ஆக்கப்பட்டோர் தொடர்பான பிரச்சினை ஆழமான ஒன்றாகத் தொடர்கிறது. உள்நாட்டுப் போரின்போது காணாமல் ஆக்கப்பட்டதாகக் கூறப்படும் தமது அன்புக்குரியவர்களைத் தேடி, பல குடும்பங்கள் பல ஆண்டுகளாக போராடி வருகின்றனர்.
காணாமல் போனோர் தொடர்பான உண்மையைக் கண்டறிந்து, பாதிக்கப்பட்ட குடும்பங்களுக்கு பதிலளிக்கும் நோக்கில் 2016ஆம் ஆண்டின் 14ஆம் இலக்க சட்டத்தின் கீழ் காணாமல் போனோர் பற்றிய அலுவலகம் நிறுவப்பட்டது.அந்த அலுவலகத்தின் அண்மைய அறிக்கையில் 31 பேர் கண்டுபிடிக்கப்பட்டுள்ளதாக குறிப்பிடப்பட்டிருந்தாலும், அவர்களின் விபரங்கள் இதுவரை பகிரங்கப்படுத்தப்படவில்லை என தெரிவிக்கப்படுகிறது.
வலிந்து காணாமல் ஆக்கப்படுதல் ஒரு தனிநபருக்கு எதிரான குற்றம் மட்டுமல்ல; அது குடும்பங்களையும் ஒட்டுமொத்த சமூகத்தையும் நீண்டகால அச்சம், துயரம் மற்றும் நிச்சயமற்ற நிலைக்குள் தள்ளும் மனித உரிமை மீறலாகும்.
உண்மை வெளிவர வேண்டும். நீதி நிலைநாட்டப்பட வேண்டும். காணாமல் ஆக்கப்பட்டோரின் குடும்பங்களுக்கு நியாயமான தீர்வு கிடைக்க வேண்டும்.
