கணேமுல்ல சஞ்சீவவின் மரணத்திற்குப் பழிவாங்குவதற்கும், போதைப்பொருள் வர்த்தகத்தை தனதாக்கிக் கொள்ளவும் சில தரப்புக்கள் தயாராகி வருவதாக புலனாய்வு அமைப்புகள் சுட்டிக்காட்டி வருகின்றன.
பாதாள உலக தரப்பில் முதன்மையான நபராக கருதப்படும் கணேமுல்ல சஞ்சீவவினால் பல குற்றவாளிகள் துபாய் போன்ற நாடுகளுக்கு அழைத்து செல்லப்பட்டதாகவும், இதன் காரணமாக அவரின் ஆதரவு தரப்பால் பழிவாங்கும் செயற்பாடு முன்னெடுக்கப்படும் எனவும் கூறப்படுகிறது.
இது குறித்து மேலும் தெரிய வருவதாவது,
கணேமுல்ல சஞ்சீவவின் கொலைக்கு பின்னணி போதைப்பொருள் வர்த்தகத்தை தனக்கே சொந்தப்படுத்துவதற்கான ஒரு திட்டம் எனவும், அதன் பின்னணியில் பாதாள உலகத் தொடர்புகள் உள்ளன என்றும் கூறப்படுகிறது. கடந்த வருடங்களில், அவரது வழிகாட்டுதலில் பல குற்றவாளிகள் துபாயில் கடத்தப்பட்டிருந்தனர்.
கைது செய்யப்பட்ட சந்தேக நபர்:மஹரகம, தம்பஹேன வீதியைச் சேர்ந்த சமிந்து தில்ஷான் கந்தனாராச்சி என்ற நபர் பிரதான சந்தேகநபராக கைது செய்யப்பட்டுள்ளார். இவர் 2014 ஆம் ஆண்டு இலங்கை இராணுவத்தில் முகமது ஷெரிப்தீன் என்ற பெயருடன் காலாட்படை வீரராக சேர்ந்தார். பின்னர் 2020 ஆம் ஆண்டு 03 ஆவது கமாண்டோ படையில் இணைந்தார். ஆனால், 2020 ஜூன் 04 அன்று கமாண்டோ பயிற்சியின் போது இராணுவத்திலிருந்து தலைமறைவாகியதாக கூறப்படுகிறது. 2024 மே 01 அன்று பொது மன்னிப்பு பெற்று சட்டப்பூர்வமாக இராணுவத்திலிருந்து ஓய்வு பெற்றுள்ளார்.
கொலை ஒப்பந்தம்:இந்தக் கொலை ஒன்றரை கோடி ரூபாய்க்கு ஒப்புக்கொள்ளப்பட்டதாகவும், சந்தேக நபர் இரண்டு இலட்சம் ரூபாய் முற்பணமாக பெற்றதாகவும் விசாரணைகளில் தெரியவந்துள்ளது. மேலும், அவர் படுவத்தே சாமரவின் ஒரு துப்பாக்கி சுடும் வீரராக சிறிது காலமாக பணியாற்றியுள்ளதாகவும், கெஹல்பத்தர பத்மசிறி, சலிந்த மற்றும் அவிஷ்கா ஆகிய குற்றவாளிகளுடனும் தொடர்பில் இருந்ததாகவும் கூறப்படுகிறது.
கொலை நடத்திய முறை:'இஷாரா' என்ற பெண் நீதிமன்றத்திற்குள் ஆயுதத்தைக் கொண்டு வந்து சந்தேக நபரிடம் வழங்கியதாக அறியப்படுகிறது. நீதிமன்ற வளாகத்தில் தனது இடுப்பில் மறைத்து வைக்கப்பட்ட துப்பாக்கியை பயன்படுத்தி கணேமுல்ல சஞ்சீவை தாக்கினார். கொலை செய்த பிறகு, தப்பிச் செல்ல முச்சக்கர வண்டியை பயன்படுத்தியதாகவும், பின்னர் ஆடையகத்திற்கு சென்று உடைகளை மாற்றிக்கொண்டதாகவும் அவர் வாக்குமூலத்தில் கூறியுள்ளார்.
தப்பி செல்ல முயற்சி:இஷாரா சந்தேக நபருக்கு இந்தியாவுக்குச் செல்லும் திட்டத்தை வழங்கியதாகவும், ஆனால் அந்தத் திட்டம் சரியாக நடக்காததால் யாழ்ப்பாணம் செல்ல திட்டமிடப்பட்டதாகவும் விசாரணையில் தெரியவந்துள்ளது. குற்றவாளிகள் தொடர்பாக பொலிஸார் தீவிரமாக தேடுதல் நடவடிக்கைகளை மேற்கொண்டு வருகின்றனர்.
சஞ்சீவவின் பாதாள உலக ஆதிக்கம்:கணேமுல்ல சஞ்சீவ துபாயில் இருந்து இலங்கைக்கு நாடு கடத்தப்பட்டதையடுத்து, அவரது பாதாள உலக ஆதிக்கம் முறியடிக்கப்பட்டதாக புலனாய்வு தரப்பினர் தெரிவித்துள்ளனர். அவரால் கட்டியெழுப்பப்பட்ட குழு உறுப்பினர்கள் ஐந்து பிரிவுகளாக பிரிந்து, ஒன்றையொன்று எதிர்த்துச் செயல்பட்டு வந்ததாகவும் தெரியவந்துள்ளது.
கணேமுல்ல சஞ்சீவவின் உறவினர்கள், அவரது மரணத்தை விசாரிக்கும் பொலிஸ் அதிகாரிகளுக்கு பலவிதமான வினாக்களை எழுப்பியுள்ளனர். இந்தக் கொலை தொடர்பான விசாரணைகள் எதிர்காலத்தில் அத்தியாவசிய பங்கு வகிக்கும் என்று எதிர்பார்க்கப்படுகிறது.
இதேவேளை , சஞ்சீவவின் உடல்:கொழும்பு பொலிஸ் பிணவறையில் அவரது பிரேத பரிசோதனை நடைபெற்றுள்ளது. சஞ்சீவவின் மனைவியின் பெயரில் ஏற்பட்ட பிரச்சினை காரணமாக, அவரது உடலை அவரது தாயாரிடம் ஒப்படைக்க கொழும்பு தலைமை நீதவான் அனுமதி வழங்கியுள்ளார். பின்னர் பொரளை மயானத்தில் அவரது உடல் அடக்கம் செய்யப்பட்டது.
நடவடிக்கைகள்:இது தொடர்பாக கொழும்பு குற்றத் தடுப்புப் பிரிவு உட்பட 10க்கும் மேற்பட்ட பொலிஸ் குழுக்கள் அமைக்கப்பட்டுள்ளன. குற்றவாளிகள் தொடர்பாக பொலிஸார் பொதுமக்களின் உதவியையும் நாடியுள்ளனர். 'இஷாரா' எனும் பெண் குறித்த உண்மையான தகவல்களை வழங்குபவர்களுக்கு வெகுமதி வழங்கப்படும் எனவும் அறிவிக்கப்பட்டுள்ளது.
தொடர்புக்கு:
கொழும்பு குற்றத் தடுப்புப் பிரிவின் இயக்குநர்: 0718591727
பிரிவின் நிலையத் தளபதி: 0718591735
இந்த வழக்கு குறித்த மேலதிக தகவல்களை பெறுவதற்கும், சந்தேகநபர்களை கைது செய்வதற்கும் பொலிஸார் தீவிரமான முயற்சிகளை மேற்கொண்டு வருகின்றனர்.
