இஸ்ரேலின் வான் பாதுகாப்பிற்குப் பாரிய சவால்: சிதறி வெடிக்கும் புதிய ஏவுகணைகளைக் களமிறக்கிய ஈரான் - பகிரங்க எச்சரிக்கை விடுத்த இஸ்ரேலிய இராணுவம்!
மத்திய கிழக்கில் இஸ்ரேலுக்கும் ஈரானுக்கும் இடையிலான யுத்தம் நாளுக்கு நாள் புதிய பரிமாணங்களை எட்டி வரும் நிலையில், ஈரான் தற்போது அதிநவீன மற்றும் மிகவும் ஆபத்தான புதிய ஏவுகணைத் தொழில்நுட்பம் ஒன்றைக் களமிறக்கியுள்ளது. இஸ்ரேலியப் பொதுமக்களுக்கும், உட்கட்டமைப்புக்களுக்கும் இது பாரிய அழிவை ஏற்படுத்தக்கூடும் என இஸ்ரேலிய இராணுவம் (IDF) பகிரங்கமான எச்சரிக்கையொன்றை விடுத்துள்ளது.
சிதறி வெடிக்கும் போர்முனைகள் (Fragmented Warheads)
ஈரானியப் படைகளால் தற்போது பயன்படுத்தப்படும் இந்த ஏவுகணைகள் சாதாரண பலிஸ்டிக் ஏவுகணைகளில் இருந்து முற்றிலும் மாறுபட்டவை என இராணுவ நிபுணர்கள் சுட்டிக்காட்டுகின்றனர். குறித்த ஏவுகணைகள் இலக்கை நோக்கித் தரையை வந்தடையும் போது, வழமை போன்று ஒரே இடத்தில் வெடிக்காமல், அதன் போர்முனைகள் (Warheads) வானிலேயே பல துண்டுகளாகச் சிதறி வெடிக்கும் வகையில் மிக நுட்பமாக வடிவமைக்கப்பட்டுள்ளன.
இராணுவத் தொழில்நுட்பத்தில் 'கொத்து குண்டுகள்' (Cluster Munitions / MIRV) என அழைக்கப்படும் இந்த வகையிலான ஏவுகணைகள், வானில் வைத்துத் தமது வயிற்றுப் பகுதியைத் திறந்து நூற்றுக்கணக்கான சிறிய குண்டுகளை ஒரு பரந்த நிலப்பரப்பின் மீது மழை போன்று சிதறவிடக்கூடிய அசுர வல்லமை கொண்டவையாகும்.
திணறும் 'அயன் டோம்' (Iron Dome) கட்டமைப்பு
இஸ்ரேலின் பலமிக்க வான் பாதுகாப்பு கவசமான 'அயன் டோம்' கட்டமைப்பு, வழமையான பாரிய ஏவுகணைகளை வானில் இடைமறித்து அழிப்பதில் சிறப்புத் தேர்ச்சி பெற்றது. இருப்பினும், ஈரானின் இந்தப் புதிய ஏவுகணைகள் வானில் வைத்து நூற்றுக்கணக்கான சிறிய இலக்குகளாகப் பிரியும் போது, அவற்றை ஒரே நேரத்தில் துல்லியமாகக் கண்காணித்து அழிப்பது இஸ்ரேலின் ராடார் மற்றும் வான் பாதுகாப்புக் கட்டமைப்புக்களுக்கு முற்றிலும் சாத்தியமற்ற ஒரு பாரிய சவாலாக உருவெடுத்துள்ளது.
பொதுமக்களுக்கான அவசர எச்சரிக்கை
வானில் வைத்து ஏவுகணையின் பிரதான பகுதி அழிக்கப்பட்டாலும், அதனுள் இருக்கும் கொத்துக் குண்டுகள் தரைக்கு வந்து சிதறி வெடிப்பதனால் பாரிய உயிரிழப்புகள் ஏற்படக்கூடிய அபாயம் நிலவுவதாக இஸ்ரேல் உத்தியோகபூர்வமாக ஒப்புக்கொண்டுள்ளது.
இதன் காரணமாக, அபாய ஒலிகள் (Sirens) எழுப்பப்பட்டால், பொதுமக்கள் எக்காரணம் கொண்டும் பதுங்கு குழிகளை (Bunkers) விட்டு உடனடியாக வெளியே வர வேண்டாம் எனவும், இந்தச் சிதறி வெடிக்கும் ஏவுகணைகளால் பரவலான ஆபத்துக்கள் உள்ளமையினால் உச்சக்கட்டப் பாதுகாப்பு நடைமுறைகளைப் பின்பற்றுமாறும் இஸ்ரேலிய இராணுவம் தனது மக்களுக்குக் கடுமையான அறிவுறுத்தல்களை வழங்கியுள்ளது.
