ஈரானுக்கு ஆதரவளித்த கையோடு களமிறங்கிய கிம்: மகளுடன் இணைந்து வட கொரியாவின் பாரிய ஏவுகணைச் சோதனை!
மத்திய கிழக்கில் ஈரானுக்குத் தனது உத்தியோகபூர்வ ஆதரவை வெளியிட்ட வட கொரியா, தற்போது தனது அசுரத்தனமான அணு ஆயுதப் பலத்தை உலகிற்குப் பறைசாற்றும் வகையில் அதிரடியான ஏவுகணைச் சோதனையொன்றை முன்னெடுத்துள்ளது. வட கொரிய அதியுயர் தலைவர் கிம் ஜொங் உன் (Kim Jong Un), தனது மகளான கிம் ஜூ ஏ (Kim Ju Ae) உடன் இணைந்து இந்த மூலோபாய 'க்ரூஸ்' (Cruise) ஏவுகணைச் சோதனையை நேரடியாகப் பார்வையிட்டுள்ளமையானது சர்வதேச அரங்கில் பெரும் அதிர்வலைகளை ஏற்படுத்தியுள்ளது.
அதிநவீன 'சோ ஹியோன்' போர்க்கப்பலில் இருந்து பாய்ந்த ஏவுகணைகள்
வட கொரியாவின் அரச செய்தி நிறுவனமான கே.சி.என்.ஏ (KCNA) வெளியிட்டுள்ள உத்தியோகபூர்வ தகவல்களின்படி, ஒரு வாரத்திற்குள் மேற்கொள்ளப்பட்ட இரண்டாவது பாரிய ஏவுகணைச் சோதனை இதுவாகும். வட கொரியக் கடற்படையின் மிகப்பெரிய அழிப்பாளர் கப்பலான 'சோ ஹியோன்' (Choe Hyon) கப்பலிலிருந்தே இந்த ஏவுகணைகள் வெற்றிகரமாக ஏவப்பட்டுள்ளன. கொரியத் தீபகற்பத்தின் மேற்குப் பகுதி கடற்பரப்பிற்கு மேலாகச் சீறிப்பாய்ந்த இந்த ஏவுகணைகள், அங்கு நிர்ணயிக்கப்பட்டிருந்த தீவு இலக்குகளைத் துல்லியமாகத் தாக்கி அழித்துள்ளன.
அடுத்த தலைமுறையைத் தயார்படுத்தும் வியூகம்
இரகசியமான ஒரு கட்டளை மையத்தில் இருந்து, பாரிய திரைகள் ஊடாக ஏவுகணைகளின் நகர்வுகளைக் கிம் ஜொங் உன்னுடன் இணைந்து அவரது மகள் உன்னிப்பாக அவதானிக்கும் காட்சிகள் தற்போது வெளியாகியுள்ளன. இளம் வயதிலேயே நாட்டின் மூலோபாய இராணுவ நடவடிக்கைகளில் வாரிசை நேரடியாக ஈடுபடுத்துவதன் மூலம், வட கொரியாவின் அணு ஆயுதக் கொள்கை எதிர்காலத்திலும் தொடரும் என்ற வலுவான செய்தியை அமெரிக்காவிற்கு அவர் உணர்த்தியுள்ளார்.
அமெரிக்காவிற்கான நேரடி எச்சரிக்கை
ஈரானியக் கடற்படையை அமெரிக்கா அழித்ததைத் தொடர்ந்தே, வட கொரியா தனது கடற்படையின் பலத்தை இவ்வாறு பகிரங்கப்படுத்தியுள்ளது. "நாட்டின் அணு ஆயுதத் தடுப்புப் பலத்தை மேலும் வலுப்படுத்துவது மிக முக்கியமான மூலோபாயப் பணியாகும்" என கிம் ஜொங் உன் இதன்போது திட்டவட்டமாகத் தெரிவித்துள்ளார். ஈரானின் கப்பல்களைப் போல வட கொரியக் கப்பல்களை அமெரிக்காவால் இலகுவாக நெருங்க முடியாது என்பதையும், அவை அணு ஆயுதங்களைத் தாங்கிச் செல்லும் வல்லமை கொண்டவை என்பதையும் பென்டகனுக்குத் (Pentagon) தெளிவுபடுத்துவதே இந்தச் சோதனையின் பிரதான நோக்கமாகும் என சர்வதேச அரசியல் ஆய்வாளர்கள் சுட்டிக்காட்டுகின்றனர்.
