வரலாற்றில் மாபெரும் எண்ணெய் நெருக்கடியை நோக்கி உலகம்: மத்திய கிழக்குப் போரால் உலகப் பொருளாதாரத்தில் பாரிய தாக்கம்!
அமெரிக்கா மற்றும் இஸ்ரேல் இணைந்து ஈரானுக்கு எதிராக முன்னெடுத்துள்ள உக்கிரமான போர் நடவடிக்கைகள் காரணமாக, உலகளாவிய ரீதியில் வரலாற்றில் மிகப்பெரிய எரிபொருள் நெருக்கடி (Oil Shock) ஏற்படும் அபாயம் தோன்றியுள்ளது. சர்வதேச சந்தையில் கச்சா எண்ணெயின் விலை சடுதியாக அதிகரித்துள்ளதுடன், உலகப் பங்குச்சந்தைகளும் பாரிய வீழ்ச்சியைச் சந்தித்துள்ளன.
115 டொலரைக் கடந்த கச்சா எண்ணெய் - ஜி7 நாடுகளின் அவசரக் கூட்டமும்
சர்வதேசச் சந்தையில் ஒரு பீப்பாய் கச்சா எண்ணெயின் விலை 115 டொலர்களைக் கடந்து உச்சத்தைத் தொட்டுள்ளது. ஹோர்மூஸ் நீரிணை (Strait of Hormuz) ஊடான எரிபொருள் விநியோகம் தடைப்படும் என்ற அச்சமே இந்த சடுதியான விலையேற்றத்திற்குக் காரணமாகும்.
நிலைமையைக் கட்டுக்குள் கொண்டுவரும் நோக்கில், ஜி7 (G7) நாடுகளின் நிதி அமைச்சர்கள் மற்றும் சர்வதேச எரிசக்தி முகவர் அமைப்பு (IEA) அவசரக் கூட்டமொன்றை நடத்தியுள்ளனர். உலக நாடுகளின் அவசரகால இருப்பிலிருந்து 300 மில்லியன் பீப்பாய் எண்ணெயை சந்தைக்கு வெளியிட அவர்கள் தீர்மானித்துள்ளனர். இருப்பினும், உலகத்தின் ஒரு நாள் எண்ணெய் நுகர்வு 104 மில்லியன் பீப்பாய்களாக உள்ள நிலையில், இந்த அவசரகால இருப்பு முற்றுமுழுதாக மூன்று நாட்களுக்குக் கூடப் போதுமானதாக அமையாது என்பது பொருளாதார நிபுணர்களின் கணிப்பாகும்.
ஆட்டம் காணும் உலகப் பங்குச்சந்தைகள்
எரிபொருள் விலை அதிகரிப்பால் ஐரோப்பிய மற்றும் ஆசியப் பங்குச்சந்தைகள் பலத்த சரிவைச் சந்தித்துள்ளன. லண்டனின் FTSE 100 சுட்டெண் 1.1 சதவீதத்தாலும், ஜேர்மனியின் Dax சுட்டெண் 1.6 சதவீதத்தாலும், பிரான்சின் Cac 40 சுட்டெண் 2 சதவீதத்தாலும் வீழ்ச்சியடைந்துள்ளன.
பிரித்தானியாவில் எரிவாயுவின் (Gas) விலை ஒரே நாளில் 25 சதவீதம் வரை உயர்ந்துள்ளது. பணவீக்கம் அதிகரிக்கும் என்ற எதிர்பார்ப்பால், அரசாங்கக் கடன் பத்திரங்களுக்கான வட்டி வீதங்கள் 3.87 சதவீதத்திலிருந்து 4.12 சதவீதமாக சடுதியாக அதிகரித்துள்ளன. இதனால் சாதாரண மக்களின் வாழ்வாதாரம் பெருமளவில் பாதிக்கப்படும் அபாயம் எழுந்துள்ளது.
நோபல் பரிசு பெற்ற நிபுணரின் பகீர் எச்சரிக்கை
இந்தப் பொருளாதார நெருக்கடி குறித்துக் கருத்துத் தெரிவித்துள்ள 2025 ஆம் ஆண்டிற்கான நோபல் பரிசு பெற்ற பொருளாதார நிபுணர் பிலிப் அகியோன் (Philippe Aghion), "இந்த யுத்தம் மேலும் சில வாரங்களுக்கு நீடித்தால் மற்றும் எண்ணெயின் விலை 150 டொலர்களைத் தாண்டினால், 1973 ஆம் ஆண்டு உலகம் சந்தித்ததைப் போன்றதொரு மாபெரும் பொருளாதார மந்தநிலையை நாம் எதிர்கொள்ள நேரிடும்" என எச்சரித்துள்ளார்.
எனினும், 2008 ஆம் ஆண்டு ஏற்பட்டதைப் போன்ற ஒரு முழுமையான உலகளாவிய நிதித்துறை வீழ்ச்சி (Financial Collapse) உடனடியாக ஏற்படுவதற்கான சாத்தியக்கூறுகள் குறைவு எனவும் அவர் சுட்டிக்காட்டியுள்ளார்.
#Tubetamil24X7 #OilShock2026 #IranWarImpact #GlobalEconomy #BreakingNewsTamil #JaffnaNews #MiddleEastCrisis #G7Meeting #EconomicCrash
