14 ஆண்டு போராட்டத்திற்கு கிடைத்த முதல் வெற்றி?
லலித்குமார் வீரராஜ் மற்றும் குகன் முருகானந்தன் ஆகியோர் காணாமல் ஆக்கப்பட்ட வழக்கில் யாழ்ப்பாணம் நீதிவான் நீதிமன்றம் வழங்கியுள்ள புதிய உத்தரவு முக்கிய திருப்பமாக பார்க்கப்படுகிறது.
இந்த உத்தரவின்படி, முன்னாள் ஜனாதிபதியும் அன்றைய பாதுகாப்புச் செயலாளருமான கோட்டாபய ராஜபக்ச, நிகழ்நிலை (Online) மூலமாகவாவது நீதிமன்றத்தில் முன்னிலையாகி சாட்சியமளிக்க வேண்டும் என அறிவிக்கப்பட்டுள்ளது.
முன்னிலை சோசலிசக் கட்சியின் கல்விச் செயலாளர் புபுது ஜயகொட, இந்த உத்தரவை "நீதிக்கான 14 ஆண்டுகால போராட்டத்தில் கிடைத்த முதல் வெற்றி" என வர்ணித்துள்ளார்.
லலித் மற்றும் குகன் ஆகியோர் காணாமல் ஆக்கப்பட்ட சம்பவம் தொடர்பான வழக்கில் பல ஆண்டுகளாக நீதி கோரி போராட்டங்கள் முன்னெடுக்கப்பட்டு வருகின்றன. இந்த வழக்கில் இருவரின் விவரங்கள் மட்டுமன்றி, கடந்த காலங்களில் காணாமல் ஆக்கப்பட்டதாகக் கூறப்படும் பலரின் தகவல்களும் உள்ளடக்கப்பட்டுள்ளதாக தெரிவிக்கப்படுகிறது. நீதிமன்றத்தின் இந்த உத்தரவு, வழக்கை தொடர்ந்து முன்னெடுத்து உண்மைகளை வெளிக்கொணரும் முயற்சிக்கு முக்கிய முன்னேற்றமாக கருதப்படுகிறது.
கோட்டாபய ராஜபக்ச நீதிமன்றத்தில் சாட்சியமளிப்பாரா? காணாமல் ஆக்கப்பட்டோரின் வழக்கில் புதிய உண்மைகள் வெளியாகுமா?என்ற கேள்விகள் தற்போது கவனத்தை ஈர்த்துள்ளன.
