கனடாவில் இருந்து யாழ் வந்த வயோதிப பெண் வீட்டில் சடலமாக மீட்பு ;

யாழ்ப்பாணம் வட்டுக்கோட்டை பொலிஸ் பிரிவிற்குட்பட்ட அராலி மத்தி பகுதியில் 74 வயதுடைய வயோதிப பெண் ஒருவர் அடித்துக் கொலை செய்யப்பட்ட சம்பவம் தொடர்பில் அவரது மகன் கைது செய்யப்பட்டுள்ளார்.

முத்துவேலு விஜயலட்சுமி என்ற 74 வயதுடைய பெண்ணே இவ்வாறு உயிரிழந்துள்ளார்.

கனடாவில் இருந்து இலங்கைக்கு வந்திருந்த குறித்த பெண், தனது மகனுடன் அராலி மத்தி பகுதியில் உள்ள வீட்டில் தங்கியிருந்த நிலையில் இந்தச் சம்பவம் இடம்பெற்றுள்ளது.

கடந்த வெள்ளிக்கிழமை குறித்த பெண் வீட்டில் சடலமாகக் காணப்படுவதாக வட்டுக்கோட்டை பொலிஸாருக்கு தகவல் கிடைத்துள்ளது. இதையடுத்து சம்பவ இடத்துக்குச் சென்ற பொலிஸார் விசாரணைகளை முன்னெடுத்துள்ளனர்.

இதன்போது, சடலத்தில் பல்வேறு அடிகாயங்கள் காணப்பட்டதுடன், வீட்டுக்குள் இருந்த பொருட்கள் பல இடங்களில் வீசப்பட்ட நிலையில் காணப்பட்டதாக பொலிஸார் தெரிவித்துள்ளனர்.

சம்பவம் தொடர்பில் நீதிமன்றத்தின் கவனத்துக்கு கொண்டு வரப்பட்டதைத் தொடர்ந்து, மல்லாகம் நீதிமன்ற நீதிவான் சம்பவ இடத்துக்குச் சென்று பார்வையிட்டுள்ளார்.

பின்னர் சடலம் யாழ்ப்பாணம் போதனா வைத்தியசாலைக்கு கொண்டு செல்லப்பட்ட நிலையில், அங்கு மேற்கொள்ளப்பட்ட உடற்கூற்றுப் பரிசோதனையின்போது பெண்ணின் உடலில் கைகளாலும், வயர்களாலும், பொல்லுகளாலும் தாக்கப்பட்டதற்கான காயங்கள் காணப்பட்டதாக தெரிவிக்கப்பட்டுள்ளது.

உடற்கூற்றுப் பரிசோதனையின் அடிப்படையில் குறித்த பெண் தாக்குதலுக்கு உள்ளாகி உயிரிழந்தமை உறுதி செய்யப்பட்டதைத் தொடர்ந்து, சம்பவம் கொலை என உறுதிப்படுத்தப்பட்டுள்ளது.

குறித்த வீட்டில் உயிரிழந்த பெண்ணும் அவரது மகனும் மட்டுமே வசித்து வந்ததாக ஆரம்பகட்ட விசாரணைகளில் தெரியவந்துள்ளது.

இதனையடுத்து, கொலைச் சம்பவம் தொடர்பில் உயிரிழந்த பெண்ணின் மகனை வட்டுக்கோட்டை பொலிஸார் கைது செய்துள்ளனர்.

கைது செய்யப்பட்ட சந்தேகநபரிடம் மேலதிக விசாரணைகள் முன்னெடுக்கப்பட்டு வருவதுடன், விசாரணைகளின் பின்னர் அவரை மல்லாகம் நீதிமன்றத்தில் முற்படுத்துவதற்கான நடவடிக்கைகள் மேற்கொள்ளப்பட்டு வருகின்றன.

இதேவேளை, கைது செய்யப்பட்ட நபர் கடந்த சில வருடங்களுக்கு முன்னர் வீதியில் பல இலட்சம் ரூபாய் பணத்தை வீசியதுடன், மேலும் பல இலட்சம் ரூபாய் பணத்தை சேதப்படுத்திய சம்பவத்துடன் தொடர்புடையவர் எனவும் தெரிவிக்கப்படுகிறது.

எவ்வாறாயினும், இந்த முந்தைய சம்பவத்துக்கும் தற்போதைய கொலைச் சம்பவத்துக்கும் இடையிலான தொடர்பு குறித்து பொலிஸார் விசாரணைகளை முன்னெடுத்து வருகின்றனர்.