போதைப்பொருள் கடத்தல்காரரான கணேமுல்ல சஞ்சீவவின் கொலைக்குப் பயன்படுத்தப்பட்ட துப்பாக்கியை வழங்கிய குற்றச்சாட்டில் தற்போது தடுப்புக்காவலில் வைக்கப்பட்டுள்ள இஷாரா செவ்வந்தி தொடர்பில் பல அதிர்ச்சித் தகவல்கள் வெளிப்பட்டுள்ளன.
கொலைக்குப் பின்னர் இஷாராவை இந்தியாவிற்கு அனுப்பி மறைத்து வைக்க சில கும்பல்கள் திட்டமிட்டிருந்ததாக காவல்துறை விசாரணையில் தெரியவந்துள்ளது.
இந்த நடவடிக்கைக்கு உதவியதாகக் கூறப்படும், யாழ்ப்பாணத்தைச் சேர்ந்த முக்கிய மனித கடத்தல்காரரை அடையாளம் காணும் முயற்சியில் காவல்துறை ஈடுபட்டுள்ளது.
காவல்துறை தகவலின்படி, அந்த சந்தேகநபர் குருநகர் படகுத்துறையின் வழியாக முன்பும் பலரை சட்டவிரோதமாக இந்தியாவிற்கு அழைத்துச் சென்றுள்ளார்.
அந்த மனித கடத்தல்காரருக்கு ஒப்பந்தம் அளித்தவர் கெஹல்பத்தர பத்மே என விசாரணையில் தெரியவந்துள்ளது.
அதன்படி, கடந்த மே 6 ஆம் திகதி, யாழ்ப்பாண குருநகர் படகுத்துறையில் இருந்து, இஷாரா செவ்வந்தி மேலும் மூவர் பாதுகாப்பில் ஒரு சிறிய படகில் இந்தியாவிற்கு கடல் வழியாக அனுப்பப்பட்டார்.
இஷாராவை இந்தியாவில் இறக்கிவிட்ட பின்னர், அந்த மூவரும் அதே படகில் யாழ்ப்பாணத்திற்குத் திரும்பியதாகவும் தகவல்கள் கூறுகின்றன. இருப்பினும், மூவரின் அடையாளங்கள் இதுவரை உறுதிப்படுத்தப்படவில்லை.
இந்த நடவடிக்கைக்கு தலைமை தாங்கிய முக்கிய மனித கடத்தல்காரர் கைது செய்யப்பட்ட பின்னரே மேலதிக விவரங்கள் வெளியாகும் என காவல்துறை எதிர்பார்க்கிறது.
விசாரணையில், கடல் பயணத்தின் போது படகு கவிழ்ந்து விடுமோ என்ற பயத்தில் அழுததாக இஷாரா தெரிவித்துள்ளார்.
இதற்கிடையில், கொழும்பு குற்றப்பிரிவு அதிகாரிகள், இஷாரா இந்தியாவிற்கு தப்பிச் செல்லும் முன் மறைந்திருந்த கிளிநொச்சி வீடுகளை சோதனை செய்துள்ளனர். அங்கு தங்க வைக்கப்பட்டிருந்த ஒருவரை கைது செய்துள்ளதாகவும் தெரிவிக்கப்பட்டுள்ளது.
காவல்துறை சிறப்புப் படையினர் பலத்த பாதுகாப்புடன், இஷாராவை நேற்று குருநகர் படகுத்துறைக்கு அழைத்துச் சென்றுள்ளனர்.
கிளிநொச்சி உள்ளிட்ட வடக்குப் பகுதிகளில் விசாரணைகள் முடிந்த பின், அவர் மீண்டும் கொழும்பு குற்றப்புலனாய்வுப் பிரிவிற்கு அழைத்துவரப்பட்டுள்ளார்.
