நாட்டுக்கு உகந்த புதிய அரசமைப்பு ஒன்று நிச்சயம் உருவாக்கப்படும் என்றும், வடக்கு, கிழக்கு மற்றும் மலையக மக்களுக்கான அரசமைப்பு சார்ந்த உரிமைகள் உறுதியாகப் பெற்றுக்கொடுக்கப்படும் என்றும் அமைச்சர் ஹர்ஷன நாணயக்கார தெரிவித்துள்ளார்.
ஊடகமொன்றுக்கு வழங்கிய விசேட நேர்காணலில் கருத்து வெளியிட்ட அவர், ஜனாதிபதி அநுரகுமார திசாநாயக்க தலைமையிலான அரசாங்கம் நீதி மற்றும் தேசிய ஒருமைப்பாட்டின் அடிப்படையில் செயற்பட்டு வருவதாக குறிப்பிட்டார்.
வடக்கு மற்றும் கிழக்கில் பல ஏக்கர் காணிகள் விடுவிக்கப்பட்டுள்ளதுடன், சில இராணுவ முகாம்களும் அகற்றப்பட்டு மக்கள் பயன்பாட்டுக்கான வீதிகள் திறக்கப்பட்டுள்ளதாக அவர் தெரிவித்தார். பொதுமக்களின் பூர்வீகக் காணிகளை மீள ஒப்படைப்பதில் அரசு உறுதியாக இருப்பதுடன், தேசிய பாதுகாப்பு காரணங்களால் காணிகளை விடுவிக்க முடியாத சந்தர்ப்பங்களில் மாற்றுக் காணி அல்லது உரிய இழப்பீடு வழங்கப்படும் எனவும் கூறினார். மலையக மக்களின் வாழ்க்கைத் தரத்தை மேம்படுத்த வீடமைப்பு மற்றும் உட்கட்டமைப்பு வசதிகளுக்கான விசேட திட்டங்கள் முன்னெடுக்கப்பட்டு வருவதாகவும் தெரிவித்தார்.மேலும், புதிய அரசமைப்பு உருவாக்கம் அனைத்துத் தரப்பினரின் பங்களிப்புடன் மேற்கொள்ளப்படும் விரிவான செயல்முறையாக இருக்கும் என்றும், அதற்கான காலவரைவு தொடர்பில் இதுவரை இறுதி முடிவு எடுக்கப்படவில்லை என்றும் அவர் குறிப்பிட்டார்.
புதிய அரசமைப்பு தமிழர்களின் நீண்டகால பிரச்சினைகளுக்கு தீர்வாக அமையுமா?
