"போர் இழப்பீடு வேண்டும்! ஹார்முஸ் எங்கள் கட்டுப்பாட்டில்தான்!" - ஈரானின் அதிரடி நிபந்தனைகளை நிராகரித்த டிரம்ப்! 
மே 11: "சீனப் பயணத்திற்கு முன் உச்சகட்ட பதற்றம்!" 
"அமெரிக்கத் தடைகளை நீக்க வேண்டும் என ஈரான் வலியுறுத்தல்!
போரை முடிவுக்குக் கொண்டு வருவதற்கான பேச்சுவார்த்தையில், ஈரான் விதித்த முக்கிய நிபந்தனைகளை அமெரிக்க அதிபர் டொனால்ட் டிரம்ப் "முற்றிலும் ஏற்க முடியாது" என நிராகரித்துள்ள நிலையில், அந்த நிபந்தனைகள் என்னென்ன என்பது குறித்த தகவல்களை ஈரானிய அரசு ஊடகம் அதிகாரப்பூர்வமாக வெளியிட்டுள்ளது! 
பாகிஸ்தான் மத்தியஸ்தர்கள் மூலம் வழங்கப்பட்ட ஈரானின் பதில் அறிக்கையில்,
1. அமெரிக்கா போர் இழப்பீடு வழங்க வேண்டும்,
2. ஹார்முஸ் ஜலசந்தி மீதான ஈரானின் முழு இறையாண்மையை ஏற்க வேண்டும்,
3. அமெரிக்கப் பொருளாதாரத் தடைகளை முழுமையாக நீக்க வேண்டும் ஆகிய நிபந்தனைகள் விதிக்கப்பட்டுள்ளன. இதில் முதல் இரண்டு நிபந்தனைகளை அமெரிக்கா ஒருபோதும் ஏற்காது.
போர்நிறுத்தம் மற்றும் அமைதிப் பேச்சுவார்த்தைகள் ஒருபுறம் நடந்தாலும், சிறிய அளவிலான தாக்குதல்கள் தொடர்ந்துகொண்டுதான் இருக்கின்றன. ஈரானிய ட்ரோன்கள் தங்கள் மீது மீண்டும் தாக்குதல் நடத்தியுள்ளதாக ஐக்கிய அரபு அமீரகம் (UAE) ஞாயிற்றுக்கிழமையன்று அதிர்ச்சித் தகவலை வெளியிட்டுள்ளது.
அமெரிக்கா ஈரானின் செறிவூட்டப்பட்ட யுரேனியம் இருப்பைக் கண்காணித்து வருவதாகவும், "ஒரு கட்டத்தில் அதை நாங்கள் கைப்பற்றுவோம்" எனவும் டிரம்ப் புதிய மிரட்டல் விடுத்துள்ளார். மேலும், போர் நடவடிக்கைகள் முடிந்துவிட்டதாக வெள்ளை மாளிகை முன்பு கூறியிருந்த நிலையில், போர் இன்னும் முடியவில்லை என்றும், ஈரான் "தோற்கடிக்கப்பட்டது, ஆனால் அவர்கள் கதை முடிந்துவிட்டது என்று அர்த்தமல்ல" என்றும் டிரம்ப் தற்போது முரண்பாடாகப் பேசியுள்ளார்.
டிரம்பின் இந்த நிராகரிப்பால் அமைதி திரும்புமா என்ற சந்தேகம் எழுந்துள்ளதால், கச்சா எண்ணெய் விலை மீண்டும் உயரத் தொடங்கியுள்ளது. இதற்கிடையே, சவுதி அரேபியாவின் தேசிய எண்ணெய் நிறுவனமான 'அராம்கோ' (Aramco) தனது முதல் காலாண்டு லாபம் 25 சதவீதம் அதிகரித்துள்ளதாக அறிவித்துள்ளது.
அதிபர் ஜி ஜின்பிங்கைச் (Xi Jinping) சந்திப்பதற்காக டிரம்ப் இந்த வாரம் சீனா செல்லவுள்ளார். மத்திய கிழக்கில் சீனாவின் நெருங்கிய கூட்டாளியான ஈரானுடனான இந்தப் போர் முடிவுக்கு வருவதையே சீனா பெரிதும் விரும்புகிறது. இந்தப் பயணத்திற்குள் போரை முடிக்க டிரம்ப் நினைத்த நிலையில், அது தற்போது கேள்விக்குறியாகியுள்ளது.
