தென்னிந்திய திரையுலகின் பழம்பெரும் நடிகை சௌகார் ஜானகி, தனது 94ஆவது வயதில் இன்று (21) சென்னையில் காலமானார். உடல்நலக்குறைவு காரணமாக மருத்துவமனையில் சிகிச்சை பெற்று வந்த நிலையில் அவர் உயிரிழந்துள்ளார்.
1950ஆம் ஆண்டு தெலுங்கில் வெளியான ‘சௌகார்’ திரைப்படம் மூலம் திரையுலகில் அறிமுகமான அவர், தமிழ், தெலுங்கு, கன்னடம், மலையாளம் உள்ளிட்ட பல மொழிகளில் 400-க்கும் மேற்பட்ட திரைப்படங்களில் நடித்துள்ளார்.
எம்.ஜி.ஆர்., சிவாஜி கணேசன், ஜெமினி கணேசன் உள்ளிட்ட முன்னணி நட்சத்திரங்களுடன் இணைந்து நடித்த சௌகார் ஜானகி, தனது நீண்டகால கலைப் பயணத்திற்காக கலைமாமணி மற்றும் பத்மஸ்ரீ உள்ளிட்ட பல விருதுகளைப் பெற்றுள்ளார்.
சௌகார் ஜானகியின் மறைவுக்கு திரையுலகினரும் ரசிகர்களும் ஆழ்ந்த இரங்கலைத் தெரிவித்து வருகின்றனர்.
