ஈரானுக்குக் கைகொடுக்கும் ரஷ்ய உளவுத்துறை: அமெரிக்காவைத் திணறடிக்கும் புதினின் தந்திரோபாய நகர்வுகளும், ட்ரம்பின் பதிலடியும்!
மத்திய கிழக்கில் இஸ்ரேல் மற்றும் அமெரிக்கப் படைகள் ஈரானுக்கு எதிராகப் பாரிய வான்வழித் தாக்குதல்களை முன்னெடுத்து வரும் நிலையில், ரஷ்ய அதிபர் விளாடிமிர் புதின் ஈரானுக்கு ஆதரவாக ஒரு மாபெரும் 'நிழல் போரை' (Shadow War) ஆரம்பித்துள்ளதாகத் தகவல்கள் வெளியாகியுள்ளன. சர்வதேசப் பாதுகாப்பு மற்றும் இராணுவ விவகாரங்களை ஆராயும் 'Defence24' உள்ளிட்ட ஊடகங்கள் இந்தத் தகவலை உறுதிப்படுத்தியுள்ளன.
ரஷ்யாவின் உளவுத்துறைப் பகிர்வு:
ரஷ்யா தனது ஆயுதப் படைகளை நேரடியாக ஈரானுக்கு அனுப்பவில்லை எனினும், அமெரிக்க மற்றும் அதன் கூட்டாளிப் படைகளின் இரகசிய நகர்வுகள், போர்க்கப்பல்களின் இருப்பிடங்கள் மற்றும் இஸ்ரேலிய வான்பாதுகாப்பு அமைப்புகளின் பலவீனங்கள் குறித்த துல்லியமான செயற்கைக்கோள் தரவுகளை (Satellite imagery) ஈரானிய இராணுவத்திற்கு வழங்கி வருகிறது. அத்துடன், உக்ரைன் போரில் ரஷ்யா பெற்றுக்கொண்ட அதிநவீன ட்ரோன் தாக்குதல் தந்திரோபாயங்களையும் (Drone tactics) ஈரானுக்குப் பயிற்றுவித்து வருவதாகக் குறிப்பிடப்பட்டுள்ளது. ஈரானின் துல்லியமான பதிலடித் தாக்குதல்களுக்கு ரஷ்யாவின் இந்த உளவுத்துறைப் பகிர்வே (Intelligence sharing) பிரதான காரணம் என பென்டகன் வட்டாரங்கள் சந்தேகிக்கின்றன.
அமெரிக்காவின் 'யு.எஸ்.எஸ் ட்ரிபோலி' நகர்வு:
ரஷ்யாவின் இந்த தந்திரோபாய நகர்வுகளை முறியடிக்கும் விதமாகவும், ஈரானுக்கு எதிரான தனது தாக்குதல் திறனை அதிகரிக்கும் நோக்கிலும், அமெரிக்கா தனது பிரம்மாண்டமான 'யு.எஸ்.எஸ் ட்ரிபோலி' (USS Tripoli) எனும் ஈரூடகப் போர்க்கப்பலை (Amphibious assault ship) மத்திய கிழக்கை நோக்கி அவசரமாக நகர்த்தியுள்ளது. இந்தக் கப்பலானது பாரிய தரைவழிப் படையெடுப்புக்காக அன்றி, ஈரானியத் தீவுகளைக் கைப்பற்றுதல் அல்லது குறிப்பிட்ட இலக்குகள் மீதான கமாண்டோத் தாக்குதல்களுக்கே (Targeted strikes) பயன்படுத்தப்படலாம் என இராணுவ ஆய்வாளர்கள் சுட்டிக்காட்டுகின்றனர்.
