பண்டாரவளை பொலிஸ் பிரிவில் பொலிஸ் நிலைய பொறுப்பதிகாரிகளுக்கான உத்தியோகபூர்வ இல்லங்களை வழங்கும் வேலைத்திட்டத்தின் கீழ், அம்பகஸ்தூவ பொலிஸ் நிலைய பொறுப்பதிகாரியின் புதிய உத்தியோகபூர்வ இல்லம் குறியீட்டு ரீதியாக திறந்து வைக்கப்பட்டுள்ளது.
ஒவ்வொரு உத்தியோகபூர்வ இல்லத்தையும் நிர்மாணிக்க சுமார் ரூ.60 இலட்சம் செலவிடப்பட்டுள்ளதுடன், பண்டாரவளை பொலிஸ் பிரிவில் மேலும் 16 உத்தியோகபூர்வ இல்லங்களை நிர்மாணித்து வழங்க திட்டமிடப்பட்டுள்ளது.
இதனுடன், உதவி பொலிஸ் அத்தியட்சகர் தரம் 2க்கான உத்தியோகபூர்வ இல்லமும் திறந்து வைக்கப்பட்டுள்ளது.மேலும், முன்னதாக பதுளையில் இயங்கி வந்த ஊவா மாகாண சிரேஷ்ட பிரதிப் பொலிஸ் மா அதிபர் அலுவலகம் மற்றும் உத்தியோகபூர்வ இல்லம் ஆகியனவும் பண்டாரவளை பகுதியில் நிறுவப்பட்டுள்ளன.
இலங்கை பொலிஸாருக்குத் தேவையான உட்கட்டமைப்பு வசதிகளை மேம்படுத்தி, பொதுமக்களுக்கு திறமையான மற்றும் வினைத்திறனான சேவையை வழங்கக்கூடிய சூழலை உருவாக்குவதே இந்தத் திட்டத்தின் பிரதான நோக்கமாகும்.
இதற்கு முன்னதாக தென் மற்றும் வட மாகாணங்களிலும் பொலிஸ் நிலைய பொறுப்பதிகாரிகள் மற்றும் தலைமையக பொலிஸ் பரிசோதகர்களுக்கான உத்தியோகபூர்வ இல்லங்கள் வழங்கப்பட்டுள்ளன.
இந்நிகழ்வில் பொது பாதுகாப்பு மற்றும் நாடாளுமன்ற அலுவல்கள் அமைச்சின் செயலாளர் ரவி செனவிரத்ன, பொலிஸ் மா அதிபர் சட்டத்தரணி பிரியந்த வீரசூரிய உள்ளிட்ட சிரேஷ்ட பொலிஸ் அதிகாரிகள் மற்றும் பதுளை மாவட்ட மக்கள் பிரதிநிதிகள் பலரும் கலந்துகொண்டனர்.
